Ֆուտբոլի Իսպանիայի առաջնության 12-րդ տուրում «Բարսելոնան» սեփական խաղադաշտում 3:1 հաշվով առավելության հասավ «Սարագոսայի» նկատմամբ:

Խաղի հաշիվը 16-րդ րոպեին բացեց աշխարհի լավագույն ֆուտբոլիստ Լիոնել Մեսին: 23-րդ րոպեին հյուրերն անսպասելիորեն հավասարեցրին հաշիվը: «Սարագոսայից» աչքի ընկավ իսպանացի հարձակվող Պակո Մոնտանյեսը: Սակայն 28-րդ րոպեին կատալոնացիները դարձյալ առաջ անցան հաշվի մեջ: Մեսին դարձավ գոլային խոփանցման հեղինակ, իսկ կամերունցի կիսապաշտպան Ալեքսանդր Սոնգը խփեց «Բարսելոնայի» երկրորդ գնդակը: Ընդմիջումից հետո՝ 60-րդ րոպեին, Մեսին դարձավ նաեւ դուբլի հեղինակ՝ խփելով խաղի վերջին գնդակը: Արգենտինացի ռմբարկուն Իսպանիայի ընթացիկ առաջնությունում իր գոլերի քանակը հասացրեց 17-ի՝ 5 գնդակով գերազանցելով Մադրիդի «Ռեալի» առաջատար Կրիշտիանու Ռոնալդուին:

«Բարսելոնան» 34 միավորով վստահորեն գլխավորում է մրցաշարային աղյուսակը: Երկորորդ տեղում գտնվող Մադրիդի «Աթլետիկոն» ունի 28 միավոր, իսկ «Սարագոսան» 15 միավորով 11-րդն է:

Իսպանիայի առաջնություն. 12-րդ տուր

«Բարսելոնա» - «Սարագոսա»՝ 3:1

Լիոնել Մեսի, 16, 60, Ալեքսանդր Սոնգ, 28 – Պակո Մոնտանյես, 23

«Վալենսիա» - «Էսպանյոլ»՝ 2:1

Խոնատան Վիերա, 16, Ռոբերտո Սոլդադո, 90 (11մ.) – Սամուելե Լոնգո, 31

Հեռացումներ՝ Հերկտոր Մորենո, 88, Սերխիո Գարսիա, 88 (երկուսն էլ՝ «Էսպանյոլ»)