Գյումրիում անօթեւան, երկու անչափահաս երեխաների մայր 40-ամյա Արփենիկ Ղազարյանի ընտանիքը, ում զրկել էին նպաստից, անհայտ բարեգործի կողմից բնակարան է նվեր ստացել:

Այսօր` դեկտեմբերի 8-ին, Արփենիկ Ղազարյանն այցելել է կադաստր, արտերկրում բնակվող մեր հայրենակիցներից մեկի կողմից նվիրաբերված Գյումրիի Մուշ-1 թաղամասում 1 սենյականոց բնակարանի սեփականաշնորհման գործարքը կատարելու նպատակով:

Այս ընտանիքի պատմության մասին տեսանյութ էր հրապարակել «Շիրակ Կենտրոնը» (անդրադարձել է նաեւ NEWS.am-ը)  եւ դա էր պատճառը, որ կադաստրից դուրս գալուց հետո, երջանիկ կինն այցելել է նաեւ «Շիրակ Կենտրոն» ու հայտնել իր երախտագիտությունը:

Ավելի վաղ NEWS.am-ը հայտնել էր, որ երկու անչափահաս երեխաների մայր 40-ամյա Արփենիկ Ղազարյանի ընտանիքին, չորրորդ ամիսն է, առանց որեւէ պատճառաբանության,  զրկել են իրենց գոյությունը պահպանելու միակ միջոցից` սոցիալական նպաստից:

«Շիրակ կենտրոնի» փոխանցմամբ, Արփենիկ Ղազարյանը  իր երկու երեխաներից մեծին` 14-ամյա Սոնային տվել է Գյումրիի «Թռչունյան տուն» մանկատուն եւ 1,5 տարեկան փոքրիկի հետ բնակվում է Գյումրիի ծայրամասային թաղամասերից մեկում` Բուլվարային 206 տարածքի 025 ավտոտնակում, որն ավելի շուտ իրենից կիսագետնափոր մի խուց է հիշեցնում:

Ավտոտնակում առանց լույսի եւ ջեռուցման իր երկու երեխաների հետ բնակվող Արփենիկ Ղազարյանի մասին տեսանյութի հրապարակումից հետո, նրան են այցելել Շիրակի մարզպետարանի եւ Գյումրիի սոցիալական ծառայության պաշտոնյաները, տեղում կատարելով ուսումնասիրություն անմիջապես վերականգնել են սոցիալական նպաստը: Այս ընտանիքին այցելել եւ օգնություն են ցուցաբերել ՀԱԵ Շիրակի թեմը, Կարիտաս միջազգային եւ մի շարք այլ տեղական  բարեգործական կազմակերպություններ: