«Էլլա» գիշերային ակումբում մոտ երկու ամիս առաջ տեղի ունեցած ծեծկռտուքի մասնակիցներից մեկին` Գոռ Պոլեյանին, փետրվարի 21-ին ոստիկանության ծառայողները Գյումրի քաղաքի Ավզնոց թաղամասում հայտնաբերել եւ բերման են ենթարկել: Պոլեյանը տեղափոխվել է ՀՀ ԱՆ «Նուբարաշեն» քրեակատարողական հիմնարկ: Այս մասին NEWS.am-ի թղթակցի հետ զրույցում հայտնեցին ոստիկանության լրատվության վարչությունից:

Ինչպես ավելի վաղ տեղեկացրել էր NEWS.am–ը, դեկտեմբերի 23-ին կեսգիշերն անց Տիգրան Մեծ պողոտայի վրա գտնվող «Էլլա» գիշերային ակումբում տեղի էր ունեցել ծեծկռտուք, որի հետեւանքով կռվի մասնակիցներից մեկը ծանր վնասվածքներով տեղափոխվել էր հիվանդանոց: Գիշերային ակումբի հաճախորդները կատաղությունից կուրացած` նույնիսկ շշերով, մոխրամաններով ու պատահած իրերով սկսել էին հարվածել միմյանց: Հաճախորդներից մեկը, ով մասնագիտությամբ բժիշկ էր, մարմնական մի շարք վնասվածքներով` գլխուղեղի ցնցում, գանգի ոսկրերի, մատների եւ քթոսկրի կոտրվածքներով, տեղափոխվել էր հիվանդանոց:

Դեպքի առթիվ հարուցվել էր քրեական գործ: