Նոր Նորքի 9-րդ զանգվածում վախի մթնոլորտ է  տիրում. բնակիչներից շատերի պնդմամբ, իրենց վարչական շրջանում մի քանի շաբաթ է ինչ  մոլագար է հայտնվել, անգամ կան տուժածներ:

«Մանյակ» կոչվածը Նոր Նորքի թիվ 120 մանկապարտեզում նախորդ ուրբաթ օրը հարձակվել է ծնողներից մի քանիսի վրա, քաշքշել նրանց, փորձել մեկի շալվարն իջեցնել ու մարմնական վնասվածքներ հասցրել:

Դեպքի առնչությամբ NEWS.am-ը զրուցեց  թիվ 120 մանկապարտեզի տնօրեն Անահիտ Քերոբյանի հետ: Նրա փոխանցմամբ, նախորդ ուբաթ տեղի ունեցած միջադեպից 15 րոպե անց ոստիկանները շրջապատել են տարածքը, սակայն մինչ այժմ նրանց չի հաջողվել հայտնաբերել հանցագործին:

Քերոբյանի խոսքով, «մանյակի» մասին խոսակցություններն ի հայտ են եկել հոկտեմբերի 1-ից:  Իսկ վերջին դեպքի մասին ծնողներն են ահազանգել` պատմելով, որ «մանյակ» կոչվածը ծնողի շալվարից է քաշել, մյուսին` խփել:

Մանկապարտեզի տնօրենն ասաց, որ բռնության ենթարկված ծնողնները չեն նկարագրել նրա արտաքին տվյալները, քանի որ չեն հասցրել ֆիքսել:

Թեեւ տարածքում վախի մթնոլորտ է տիրում, բայց մանկապարտեզը շարունակում է իր նախկին հունով աշխատել: «Բայց ամեն րոպե ինձ մոտ եւս սպասողական վիճակ է, որ «մանյակը» երեւա եւ նրան բռնեն»,- ավելացրեց Անահիտ Քերոբյանը, մտահոգություն հայտնելով, որ  շատ հնարավոր է այդ տարծքում  այլեւս չհայտնվի  եւ մեկ այլ թիրախ ընտրի:

Նոր Նորքի ոստիկանության քրեականի պետ  Գառնիկ Մարտիրոսայանը NEWS.am-ի թղթակցի հետ զրույցում նշեց, որ ներկա պահին տեղեկատվություն չունի եւ հավելյալ տեղեկությունների դեպքում կտեղեկացնի: