Բարսելոնայի գլխավոր մարզիչ Պեպ Գվարդիոլան Իսպանիայի առաջնության 16-րդ տուրի Ռեալի հետ հանդիպումից առաջ հայտարարել է, որ գիտի, թե ինչ է պետք Մոուրինյոյի թիմին հաղթելու համար:

«Ռեալին հաղթելու համար պետք է ցուցադրել անթերի խաղ: Կարծում եմ, որ Ռեալը պրեսինգի կդիմի հենց առաջին րոպեներից: Պետք է պատրաստ լինել դրան: Մենք միշտ ձգտում ենք ուսումնասիրել մրցակցին եւ վերջին հանդիպումներում մրցակցի ցուցադրած խաղը: Մենք նաեւ փորձում ենք հասկանալ մեր սխալները եւ ուղղել դրանք: Ես մեկնում են Մադրիդ հաղթելու համար: «Սանտյագո Բեռնաբեու» ստադիոնում խաղը միշտ հարուստ է լինում հույզերով: Մենք մրցակցի ստադիոնում մրցելու ենք առաջատարի դեմ եւ փորձելու ենք խաղալ ինչքան հնարավոր է լավ»,- ասել է Գվարդիոլան:

Մարտավարական դասավորության վերաբերյալ Բարսելոնայի գլխավոր մարզիչը հայտարարել է, որ այս խաղում առավել կարեւոր կլինի հոգեբանական գործոնը:

«Նշանակություն չունի` երեք, թե չորս պաշտպաններով մենք կխաղանք: Շատ ավելի կարեւոր է հոգեբանական գործոնը. թիմը պետք է կարողանա դիմակայել` բախվելով դժվարությունների: Ֆուտբոլը պաշտպանությունով չի ավարտվում: Մենք կձգտենք գնդակ խփել. միայն այդպես է հնարավոր հաղթել Ռեալին»,- ասել է Գվարդիոլան:

Այսօր, դեկտեմբերի 10-ին կայանալիք սուպերկլասիկոյից առաջ Ռեալը գլխավորում է մրցաշարային աղյուսակը. Մոուրինյոյի թիմը 14 խաղում վաստակել է 37 միավոր: Բարսելոնան երկրորդ տեղում է. 15 խաղում` 34 միավոր: