11:01 Հոգեբան. Հայաստանում ինքնասպանությունների թիվն աճել է | |
Սեպտեմբեր 10, 2011 | 19:38 Վերջին տարիներին աղանդավորականների պատճառով Հայաստանում ինքնասպանությունների թիվն աճել է: Այդ մասին սեպտեմբերի 10-ին կայացած ասուլիսում հայտարարել է հոգեբան, հոգեբանական գիտությունների թեկնածու Սամվել Խուդոյանը: Նրա խոսքով, շատ աղանդներ իրենց անդամներին մեղքի զգացողություն եւ երկրային կյանքի հանդեպ վախ են ներշնչում, վախեցնում են աշխարհի վերջով, վերացնում են որպես անհատ` դրանով իսկ դրդելով նրանց ինքնասպանության: Քիչ չեն նաեւ հոգեկան հիվանդությամբ տառապող մարդիկ: Այն հարցին, թե կա արդյոք վիճակագրություն, որը հաստատում է, որ Հայաստանում ինքնասպանների մեծամասնությունը հանդիսանում է աղանդների հետեւորդներ, Խուդոյանը բացասական պատասխան է տվել. «Նման վիճակագրություն չի իրականացվում, սակայն աղանդավորականների շրջանում տարածված է ինքնազոհաբերման գաղափարը»: Քահանա Բաբկեն Հայրապետյանի խոսքով, եկեղեցին թաղման արարողություն չի իրականացնում ինքնասպանների համար, եթե ինքնասպանությունը եղել է գիտակցված, իսկ ավելի վաղ ժամանակներում ինքնասպաններին թաղել են փոսի մեջ, դեմքով դեպի գետին` գերեզմանատան սահմաններից դուրս. «Եկեղեցին չի ներում նրանց, ովքեր գիտակցված ինքնասպանություն են գործում»: Պատասխանելով այն հարցին, թե ինչպես է եկեղեցին որոշում ինքնասպանության գիտակցված եւ չգիտակցված լինելը` քահանա Հայրապետյանը նշել է. «Հիմնականում, եթե կան տեղեկություններ, որ ինքնասպանը գրանցված է եղել հոգեբուժարանում, ապա այդ մարդը անգիտակցաբար է ինքնասպանության դիմել: Սակայն դեպքեր են լինում, երբ հարազատները հաղորդում են, որ ինքնասպանությունը տեղի է ունեցել աֆեկտի վիճակում, եւ դա չի եղել կանխամտածված: Այդ ժամանակ մենք զգուշացնում ենք, որ ստի համար մեղքը նրանց վրա է անցնելու, եւ իրականացնում ենք թաղման արարողությունը»: Այդ հայտարարությանը արձագանքեց հոգեբան Խուդոյանը. «Նրանցից ոչ մեկ ինքնասպանության չի գնում նորմալ վիճակում, բոլոր ինքնասպաններն էլ գտնվում են աֆեկտի վիճակում»: Նշենք, որ Առողջապահության միջազգային կազմակերպությունը` ինքնասպանութան կանխման միջազգային ասոցիացիայի օժանդակությամբ սեպտեմբերի 10-ին անց է կացնում ինքնասպանությունների կանխման միջազգային օրը: Առողջապահության միջազգային կազմակերպության տվյալներով, տարեկան մոտ մեկ միլիոն մարդ ինքնասպան է լինում: Դա տեղի է ունենում հատկապես զարգացած երկրներում: Առաջնությունը պատկանում է Արեւելյան Եվրոպայի երկրներին: Ճապոնիայուն տարեկան 30 հազար մարդ է ինքնասպան լինում: Ավելի ցածր ցուցանիշները գրանցվել են Լատինական Ամերիկայում եւ իսլամական աշխարհում: Աֆրիկայի վերաբերյալ վիճակագրական տվյալները փաստացի բացակայում են: | |
|
Всего комментариев: 0 | |