Հսկայական աստղակերպը նոյեմբերի 8-ին կանցնի Երկրի մոտով ավելի քիչ հեռավորությունից, քան Լուսնի նկատմամբ է, հայտնում է BBC-ի ռուսական ծառայությունը:

400 մետր տրամագծով աստղակերպը կանցնի 325 հազ. կմ հեռավորությունից, 23.28` ըստ Գրինվիչի, սակայն անզեն աչքով տեսանելի չի լինի: Փոքր մոլորակը հեռադիտակներով կարող են դիտել  հյուսիսային կիսագնդի աստղագետները:

Մասնագետները հավաստիացնում են, որ 2005 YU 55 աստղակերպը չի կարող Երկրին վնասել ծայրահեղ դեպքում այնքան ժամանակ, քանի դեռ ուսումնասիրողները կարողանում են հետեւել  դրան համակարգիչներով, իսկ դա  մի քանի հարյուր տարի կշարունակվի: Բայց այսքան մոտ տարածությունից սլանալը նրանց բացառիկ հնարավորություն է  ընձեռում ուսումնասիրել տվյալ երկնային մարմինը, ինչը հնարավոր է դարձնում ստեղծել Երկրի հետ բախման հետեւանքով առաջացող հնարավոր վթարի պատկերը եւ այդ դեպքի համար համապատասխան մարտավարություն մշակել:

Տեսականորեն 2005 YU55 աստղակերպը օվկիանոսում ընկնելիս կարող է Ռիխտերի սանդղակով 7 բալանոց երկրաշարժ  եւ 22 մետր բարձրությամբ ցունամի առաջացնել` հարվածի վայրից 100 կմ հեռավորության վրա: Դրա ցամաքում ընկնելու դեպքում Երկրի վրա 6 կմ տրամագծով եւ 500 մետրից ավելի խորությամբ ճեղք կգոյանա:

Բայց նման բախումները 100 հազ. տարին մեկ անգամ են պատահում: Դիտարկվող աստղակերպը Երկրին ավելի կմոտենա 2094 թվականին:

1976թ.-ից ի վեր սա ամենախոշոր օբյեկտն է, որը հատել է լուսնային ուղեծիրը եւ մոտեցել Երկրին: Հաջորդ անգամ նմանատիպ երեւույթ կլինի 2028 թվականին: Ըստ ՆԱՍԱ-ի` Երկրից ոչ հեռու, Արեւի շուրջը սավառնում են 1262 «պոտենցիալ վտանգավոր»  աստղակերպեր, որոնց տրամագիծը 150 մետրից ավելի է, գրում է «Մոսկովսկի կոմսոմոլեցը»: