Բելգիահայ R&B երգչուհի Կարինե Օհանյանը միջազգային պայմանագիր է կնքում աշխարհի խոշորագույն երաժշտական ընկերություններից մեկի հետ։ Այս մասին NEWS.am-ի թղթակցի հետ զրույցում ասաց ինքը՝ Կարինե Օհանյանը։

«Այժմ քննարկվում է մի քանի ընկերությունների առաջարկներ։ Կհամաձայնեմ համագործակցել առավել լավ պայմաններ առաջարկող ընկերության հետ։ Պայմանագիրը կնքելու եմ ոչ լոկալ տարածաշրջանի, այլ միջազգայինի համար»,- նշեց Կարինեն։ Ըստ նրա՝ տարածաշրջանային՝ լոկալ, պայմանագրի դեպքում համագործակցող ընկերությունը երգիչներին ներկայացնում է որոշված տարածքում, իսկ միջազգայինի դեպքում ընկերությունը զբաղվում է երգչի ներկայացման հարցերով բոլոր երկրներում։

Կարինեն արդեն երգել է NeYo-ի հետ։ Նոր երգը եւ հոլովակը դեռեւս չի ցուցադրվել։ NeYo-ի հետ համագործակցությունից հետո միջազգային այցելություններից առաջ նա ընտրել է նաեւ երգչի One In A Million երգը կրկնակատարման համար։ «Արտասահմանում ընդունված է, որ երգիչները կատարեն միմյաց երգերը։ Դրանից չի խուսափում նույնիսկ Մադոննան։ Օրինակ՝ Բելգիայում համերգի ժամանակ Մադոննան 50 Սենթի երգերից մեկը կատարեց։ Իսկ իմ դեպքում մենեջերներս ավելի հարմար գտան, որ ես միջազգային այցելություններից առաջ կատարեմ արդեն ճանաչված երգեր, քան իմ սեփական երգերով հանդես գամ»,- ասաց Կարինեն։

Ըստ նրա միջազգային այցելությունները նա կսկսի մոտ 6 ամսից։ Նույն ժամանակ էլ դուրս կգա նրա սեփական երգերի ձայնասկավառակը։