Շախմատում ամենածանրը վերջին տուրից առաջ առաջատար լինելն է եւ մրցաշարը չհաղթելը: Այդ մասին Միխայիլ Տալի հուշամրցաշարի ավարտից հետո հայտարարել է Լեւոն Արոնյանը, որը աշխարհի առաջին համար Մագնւոս Կարլսենի հետ վաստակեց 5,5-ական միավոր, սակայն զիջեց առաջին տեղը, քանի որ նորվեգացին ավելի շատ պարտիաներ էր անցկացրել սեւ ֆիգուրներով:

Աշխարհում երրորդ վարկանիշն ունեցող Արոնյանը նշել է, որ գոհ է Մոսկվայում իր ցուցադրած խաղի որակից: «Ստացվեց նորմալ հանդես գալ: Տպավորությունները մրցաշարից դրական են: Ես մի փոքր հոգնած էի Հունաստանում կայացած Եվրոպայի թիմային առաջնությունից հետո եւ հանդես եկա որոշակի մակարդակից ոչ ցածր: Գլխավոր արդյունքն այն է, որ ես առաջին տեղը կիսում եմ արժանի մարդկանց հետ, այլ ոչ թե զբաղեցնում վերջին տեղերը»,- ասել է Արոնյանը Р-Спорт-ին:

Լեւոն Արոնյանը երրորդ անգամ Տալի հուշամրցաշարերում բաժանում է առաջին տեղը, ինչը ռեկորդային է: