Հայաստանի օլիմպիականների թիվը ավելացավ ըմբշամարտի վարկանիշային մրցաշարերից հետո: Լոնդոնի Օլիմպիական խաղերում Հայաստանը կունենա յոթ ըմբիշ:  Մինչեւ Բուլղարիայում, Չինաստանում եւ Ֆինլանդիայում անցկացվելիք մրցաշարերը մեր ըմբիշները մեկական օլիմպիական ուղեգիր ունեին ազատ եւ հունահռոմեական ոճում: Հիմա արդեն պարզ է, որ Լոնդոնում հանդես են գալու ազատ ոճային երեք ըմբիշներ եւ հունահռոմեական ոճի չորս մարզիկներ: Ֆինլանդիայում ապրիլի 4-ից 6-ն անցկացված վարկանիշային մրցաշարում սպասելիքները հիմնականում կապված էին  55 կգ քաշային Ռոման Ամոյանի հետ, սակայն փորձառու ըմբիշին չհաջողվեց հասնել նպատակին, իսկ ահա Հովհաննես Վարդերեսյանը նվաճեց բաղձալի ուղեգիրը:

NEWS.am Sport-ի թղթակիցը զրուցել է հունահռոմեական ոճի ըմբշամարտի Հայաստանի հավաքականի գլխավոր մարզիչ Լեւոն Ջուլֆալակյանի հետ:

Պարոն Ջուլֆալակյան վարկանիշային մրցաշարերը ավարտվեցին, ինչպե՞ս եք գնահատում հավաքականի ելույթները:

Անկեղծ ասած մենք ավելիին էինք սպասում եւ կարող էինք ավելի շատ մարզիկներով ներկայանալ Օլիմպիական խաղերում: Սակայն փաստն այն է, որ Լոնդոնում հանդես ենք գալու չորս ըմբիշներով: Չեմ ուզում հիմա շատ գործոնների մասին խոսել, որոնք պարզապես խանգարեցին մեզ լավ արդյունքի հասնել. նկատի ունեմ մրցավարական բազմաթիվ սխալները: Ուղղակի ասեմ, որ մենք մեծ սպասելիքներ ունեինք Ռոման Ամոյանից: Բայց մեր փորձառու ըմբիշը Եվրոպայի առաջնությունից հետո այդպես էլ չկարողացավ հաղթահարել հոգեբանական արգելքը, որն առաջացավ  այդ առաջնությունից հետո: Նշեմ, որ մենք ոչ միայն ակնկալում էինք, որ նա վարկանիշ ձեռք կբերի. մենք հավատում էինք, որ նա Օլիմիպիական խաղերում էլ մեդալ է նվաճելու: Ցավոք, դա մեր ըմբիշին արդեն չի հաջողվի 2012 թվականին:

Հովհաննես Վարդերսյանի ելույթի մասին ի՞նչ կասեք

Ես ընդհանրապես գոհ եմ 66 կգ քաշային կարգում հանդես եկած մեր երեք ըմբիշներից: Վարկանիշային բոլոր մրցումներում էլ մեր տղաները լավ հանդես եկան ու շատ մոտ էին վարկանիշ ձեռք բերելուն թե Բուլղարիայում, թե Չինաստանում եւ թե Ֆինլանդիայում: Իվերջո, դա հաջողվեց Հովհաննես Վարդերեսյանին, ով արժանի էր օլիմպիական հավաքականում տեղ ունենալուն:

Իսկ ուղեգրերի քանակը ձեզ գոհացրե՞ց:

Մենք հնարավորություն ունեինք Օլիմպիական խաղերում հանդես գալու լրիվ կազմով եւ դրա հիմքը կար, քանի որ ունենք շատ լավ ըմբիշներ: Բայց սպորտը մնում է սպորտ: Լինում են պահեր, որոնք կանխատեսել հնարավոր չէ: Հիմա ունենք, այն ինչ ունենք, ու կարեւորն է արդեն այս չորս մարզիկներով հասնել օլիմպիական պատվանդանին:

Օլիմպիական խաղերը սարերի հետեւում չեն: Թիմի նախապատրաստաան ծրագրերը ինչպիսի՞ն են:

Մայիսի 16-19-ը Սարանսկում Հայաստանի հավաքականը մասնակցելու է աշխարհի գավաթի խաղարկությանը: Հնարավոր է, որ այդ մրցումներիին մասնակցենք  երկրորդ կազմով, առայժմ չեմ կողմնորոշվել այդ հարցում: Հետո մի փոքր հանգիստ կտանք մարզիկներին ու կսկսենք ամենայն լրջությմաբ պատրաստվել օլիմպիադային:

Զրուցեց Խաչիկ Չախոյանը