Հունահռոմեական ոճի ըմբշամարտի ՀՀ ազգային հավաքականի գլխավոր մարզիչ, օլիմպիական չեմպիոն Լեւոն Ջուլֆալակյանը News.am-ի թղթակցի հետ հարցազրույցում ամփոփել է մրցաշրջան-2011-ի արդյունքները:

Այս տարի մեր հավաքականը Եվրոպայի առաջնությունում 7 քաշային կարգերից 4-ում մեդալ է նվաճել` 1-ական ոսկե ու արծաթե, 2` բրոնզե: Թիմային պայքարում Հայաստանը գրավել է 3-րդ տեղը: Աշխարհի առաջնությունում 1 բրոնզե մեդալի ու 1 օլիմպիական ուղեգրի է արժանացել, թիմային պայքարում էլ տեղ է զբաղեցրել ուժեղագույնների տասնյակում (9-րդ տեղ): Իսկ ահա աշխարհի թիմային գավաթի խաղարկությունում հանդես գալով երիտասարդական կազմով, աշխարհի 10 լավագույն ընտրանիների մրցավեճում գրավեցինք 7-րդ տեղը: Հանրագումարի բերելով այս բոլոր արդյուքները, մեր ընտրանու ելույթները ընդհանուր առմամբ գնահատում եմ բավարար: Թեպետ պիտի խոստովանեմ, որ Ստամբուլում կայացած աշխարհի առաջնությունում հաշվի առնելով մեր տղաների պատրաստականությունը, անձամբ մեր հավաքականից ավելին էի սպասում: Մի քիչ այնպես չստացվեց, ինչպես մենք էինք ուզում: Ամենեւին էլ արդարանալու համար չեմ ասում: Տղաներն իրոք շատ լավ էին պատրաստված եւ նորմալ էլ հանդես եկան, պարզապես մարզական բախտը այստեղ երես էր թեքել մեզանից:

Ի՞նչը խանգարեց, եւ հատկապես ինչո՞վ մրցակիցներին զիջեցին բազմափորձ Ռոման Ամոյանն (55 կգ) ու գերծանր քաշային Յուրի Պատրիկեեւը:

Օբյեկտիվ գնահատականներ տալու համար ելույթների մասնագիտական մանրակրկիտ, լուրջ վերլուծություն է հարկավոր կատարել, հաշվի առնել բոլոր նրբությունները: Կոնկրետ Պատրիկեեւը ոչնչով չզիջեց իր հակառակորդներին, ուղղակի Ստամբուլում մարզական բախտը փոքր ինչ չժպտաց նրան: Դատեք ինքներդ. վճռորոշ գոտեմարտում Յուրին գետնեց մրցակցին, ու երբ թվում էր հաղթանակը շատ մոտ է, պարզվեց ոտքը աննշան՝ 1 սմ-ով մրցագորգից դուրս է դրել: Նա ցավալի պարտություն կրեց եւ զրկվեց թե մեդալից, եւ թե օլիմպիական ուղեգրից: Ամոյանի պարագայում զգացվեց, որ նա իր պատրաստակամությամբ լիարժեք չի հասել մարզավիճակի գագաթնակետին: Ամեն դեպքում մեկ օլիմպիական ուղեգիրը բավարար չէր, ու ուժեղ կազմ ունեցող մեր ընտրանին, կարծում եմ, իրոք ավելիին էր արժանի:

Իսկ արդյուքների վրա ազդեց այն, որ մրցաշարը անցկացվում էր Թուրքիայում: Եղան արդյո՞ք կողմնակալ մրցավարության դեպքեր:

Դրանք եւս կարեւոր գործոններ են, որ որոշակիորեն անդրադարձան մեր ըմբիշների ելույթների վրա: Այսպես, Եվրոպայի փոխչեմպիոն, 96 կգ քաշային 20-ամյա Արթուր Ալեքսանյանը թուրք ըմբիշի հետ գոտեմարտում անարդարացի մրցավարության «զոհ» դարձավ: Մրցավարները պարզապես հաղթանակը «նվիրեցին» Թուրքիայի պատվիրակին, հակառակ դեպքում Ալեքսանյանը նվազագույնն դառնում էր մեդալակիր: Այսպես մենք զրկվեցինք եւս մեկ օլիմպիական ուղեգրից: Ամեն դեպքում մեկ անգամ եւս կրկնեմ, որ միանշանակ ճիշտ եզրահանգումներ չի կարելի կատարել առանց խորը մասնագիտական վերլուծությունների:

Ի՞նչ ծրագրեր ունի հավաքականն առաջիկայում:

Դեկտեմբերի 11-25-ը հունահռոմեական ոճի ըմբշամարտի ՀՀ  ազգային եւ երիտասարդական հավաքականների համատեղ ուսումնամարզական հավաք կանցկացնենք Ծաղկաձորում, որին ընդհանուր առմամբ 40 ըմբիշ կմասնակցի: Գործնականում այս հավաքով կսկսենք գալիք՝ օլիմպիական մրցաշրջանի նախապատարաստությունը: