Սուրբ Գրիգոր Լուսավորիչ բժշկական կենտրոնի վերակենդանացման բաժանմունքում, հունվարի 18-ին էսենցիայի թունավորումից մահացած Հայաստանի ՊՆ N զորամասի զինծառայող, ենթասպա Վահան Ասլիկյանը, մահվանից առաջ գրություն է թողել, որտեղ բացատրում է, որ իր վրա ցանկանում են ֆինանսական չարաշահումներ բարդել: NEWS.am-ի այս տեղեկությունը չհերքեց նաեւ ՊՆ քննչական ծառայության հասարակայնության հետ կապերի ավագ սպա Մերի Սարգսյանը, նշելով. «Նախաքննությունը բոլոր վարկածների շուրջ քննություն է իրականացնում»:

Նրա խոսքով, ներկա պահին այս գործով ձերբակալվածներ ու կասկածյալներ չկան:

Նշենք, որ մահվանից առաջ թողած բացատրագրում Վահան Ասլիկյանը մասնավորապես խնդրում է իրեն չմեղադրել, որովհետեւ երբ ինքն աշխատանքի է անցել վաշտում, վաշտի հրամանատարն իրեն ասել է, որ «ընդունի վաշտը պակասորդով, բայց գրի, որ լրիվ նորմալ է»: Նա նաեւ նշել է, որ բացատրագիրը գրված է իր ձեռքով, որի համար ստորագրում է:

Պակասորդը մոտավորապես 2 միլիոն դրամ է եղել: Ի դեպ, նրան հիվանդանոց տեղափոխելու ճանապարհին է պատահաբար բացատրագիրն ընկել գրպանից:

Վահանին ճանաչողները նշում են, որ նա 2 անչափահաս երեխա ուներ եւ դժվար թե 2 միլիոնի համար դիմեր այդ քայլին, հետեւաբար, հնարավոր է այլ պատճառներ էլ եղած լինեն:

Հիշեցենք, որ Մերի Սարգսյանն ավելի վաղ տեղեկացրել էր, որ Վահան Ասլիկյանը «Գրիգոր Լուսավորիչ» բժշկական կենտրոն է ընդունվել հունվարի 18-ին, ժամը 12.35-ին` «թունավորում էսենցիայով» ախտորոշմամբ: Վերջինիս հայտնաբերել է կինը` տանն արյունահոսելիս եւ անմիջապես տեղափոխել վերը նշված բժշկական կենտրոն: Փաստի առթիվ ՀՀ Պն քննչական ծառայության 4-րդ կայազորային քննչական բաժնում ՀՀ Քր.Օր 110 հոդվածի 1-ին մասի` ինքնասպանության հասցնելու հատկանիշներով երեկ հարուցվել է քրեական գործ եւ կատարվում է նախաքննություն:

Ի դեպ, Վահան Ասլիկյանի ընտանիքը մինչ օրս բնակվում է Նոր Նորքի 2-րդ զանգվածի վագոն-տնակներից մեկում: Նա ավելի վաղ նամակով դիմել էր պաշտպանության նախարար Սեյրան Օհանյանին եւ խնդրել օգնել բնակարանի հարցով: Նրա նամակին ՊՆ-ն պատասխանել է հունվարի 19-ին, որտեղ նշվել է, թե նա հերթում 59-րդ է: Բայց մինչ այդ նա արդեն մահացած է եղել:

NEWS.am-ը դիմեց նաեւ ՊՆ տեղեկատվության եւ հասարակայնության հետ կապերի վարչություն, պարզելու համար, թե Ասլիկյանի մահը կարո՞ղ է խոչընդոտ հանդիսանալ, որ նրա ընտանիքը դուրս մնա բնակարան ստանալու հերթից, սակայն մեզ առաջարկեցին գրավոր հարցում ուղարկել եւ խոստացան, որ այդ հարցին կպատասխանեն առաջիկայում: