Այսօր, հոկտեմբերի 11-ին, Երեւանի ժամանակով 22:45-ին Դուբլինում կայանալիք Եվրոպայի առաջնության ընտրական մրցաշարի Իռլանդիա - Հայաստան վերջին խաղից առաջ Արարատ-73-ի լեգենդար ֆուտբոլիստներ Արկադի Անդրեասյանն ու Սերգեյ Պողոսյանը լրագրողների հետ հանդիպման ժամանակ խոսեցին Հայաստանի ազգային հավաքականի խաղի մասին եւ իրենց կանխատեսումներն արեցին Իռլանդիայի հավաքականի հետ հանդիպման վերաբերյալ:

Արկադի Անդրեասյանը հայտարարեց, որ ազգային հավաքականի կորիզն արդեն ձեւավորվել է, թիմը վերելքի փուլում է գտնվում եւ պետք է ակնկալել դրական արդյունք: Այդուամենայնիվ, Անդրեասյանը նաեւ նշեց, որ իռլանդացիների հետ խաղալը չափազանց բարդ է լինելու:

«Մրցակցին ոչ ոքի է անհրաժեշտ, Իռլանդիայի հավաքականն ունի փորձառու մարզիչ: Ջովանի Տրապատոնին սիրում է խաղալ պաշտպանությունից: Թիմը երկար ժամանակ է գնդակ բաց չի թողնում: Եթե մեր թիմը պրեսինգի ենթարկի իռլանդացիներին այնպես, ինչպես Սլովակիայի թիմին, ապա դրական արդյունք կլինի: Մեր թիմի պաշտպանությունն է թույլ, այդ գծում չեն բավարարում բարձրակարգ ֆուտբոլիստներ: Հենրիխ Մխիթարյանի, Յուրա Մովսիսյանի շնորհիվ հարձակման գիծը գերազանց խաղ է ցուցադրում:

Ցանկանում եմ, որ հաջողություն, հաղթանակ լինի, որ մեր ժողովուրդը ուրախանա: Իսկ հաշիվ կանխատեսելը շատ բարդ է: Եթե առաջինը խփենք` մենք կհաղթենք: Ամենակարեւորը, որ մեր ֆուտբոլիստները հոգեբանորեն պատրաստ լինեն վճռական խաղին: Հաղթողի ոգին պետք է գերիշխի մեր հավաքականում»,- հայտարարեց Արարատի գլխավոր մարզիչ Արկադի Անդրեասյանը:

Սերգեյ Պողոսյանը նշեց, որ ազգային հավաքականը վերջին խաղերում գեղեցիկ ու բովանադակային խաղ է ցուցադրում` ուրախացնելով երկրպագուներին եւ դա թիմի գլխավոր մարզիչ Վարդան Մինասյանի աշխատանքի եւ ֆուտբոլիստների անհատական վարպետության ու նվիրվածության շնորհիվ է: Պողոսյանը եւս կանխատեսում է ծանրագույն հանդիպում Դուբլինում:

«Դուբլինի խաղը շատ բարդ է լինելու: Սակայն մեր թիմը թույլ չէ: Ժամանակակից, մոբիլ, կոլեկտիվ ֆուտբոլ է խաղում Հայաստանի հավաքականը: Բոլոր օղակները միմյանց հետ համագործակցում են: Եթե հաջողությունը ուղեկցի մեզ, ապա մեր թիմը կհաղթի:

Ամենակարեւորը, որ մեր հավաքականն այժմ թիմային խաղ է ցուցադրում: Դա Վարդան Մինասյանի աշխատանքի արդյունքն է: Խաղային կարգապահության շնորհիվ թիմը կարողանում է մարզչի ռազմավարությունը իրագործել խաղադաշտում: Մեր հարձակման եւ պաշտպանության համագործակցությունը ամբողջությամբ մշակված է եւ դրա շնորհիվ էլ արդյունք ենք ունենում»,- նշեց Սերգեյ Պողոսյանը:

Սերգեյ Պողոսյանը եւս խուսափեց հաշիվ կանխատեսել:

«Կազինո չեմ գնում, տոտալիզատոր չեմ խաղում: Տեսնում եմ մեր թիմի ցուցադրած խաղի բովանդակությունը, հուսով եմ մի բռունցք կլինի եւ հաղթանակ կտանի: Ես լավատես եմ: Ֆուտբոլը միավորում է մարդկանց, այնքան էներգիա է տալիս մեր ժողովրդին եւ հույս ունենանք, որ մեր տղաները կհաղթեն: Կարեւորը առաջինը բաց չթողնել: Եթե մենք կարողանանք զսպել Իռլանդիայի գրոհները, մեր ֆուտբոլիստները կստեղծեն պահեր եւ կխփեն գոլ: Եթե նույնիսկ հաղթանակ չլինի, հուսալքվել չի կարելի: Մեր ֆուտբոլը զարգանում է եւ առաջ ենք գնում»,- եզրափակեց Սերգեյ Պողոսյանը:

Հիշեցնենք, որ Իռալնդիա – Հայաստան հանդիպման արդյունքում հայտնի կդառնա ընտրական B խմբի երկրորդ տեղ գրավող եւ անցումային հանդիպումների իրավունք ստացող հավաքականը: