Главная » 2013 » Март » 23 » Արթուր Ալեքսանյանը՝ Եվրոպայի կրկնակի չեմպիոն

20:29

Արթուր Ալեքսանյանը՝ Եվրոպայի կրկնակի չեմպիոն

96 կգ քաշային հունահռոմեական ոճի ըմբիշ Արթուր Ալեքսանյանը երկրորդ տարին անընդմեջ նվաճեց Եվրոպայի չեմպիոնի տիտղոսը: Թբիլիսիում ընթացող առաջնության եզրափակիչում Հայաստանի հավաքականի ըմբիշ Արթուր Ալեքսանյանը եզրափակիչում առավելության հասավ բուլղարացի Վլադիսլավ Մետոդիեւի նկատմամբ:

Գոտեմարտի առաջին մրցափուլում Արթուր Ալեքսանյանը 3 միավորի գլորում կատարեց: Մրցակիցը որեւէ արդյունավետ հնարք կատարել չկարողացավ: Վլադիսլավ Մետոդիեւի մարտավկան Բուլղարիայի հավաքականի գլխավոր մարզիչ, կրկնակի օլիմպիական չեմպիոն Արմեն Նազարյանն էր:

Երկրորդ մրցափուլում եւս Արթուր Ալեքսանյանը բացահայտ առավելություն ուներ, վաստակեց 3 միավոր եւ հռչակվեց Եվրոպայի չեմպիոն:

Լոնդոնի Օլիմպիական խաղերի բրոնզե մեդալակիր Արթուր Ալեքսանյանը կիսաեզրափակիչում 1:0, 3:0 հաշվով առավելության էր հասել ադրբեջանցի Շալվա Գադաբաձեի նկատմամբ, իսկ քառորդ եզրափակիչում Արթուր Ալեքսանյանը 2:0, 2:0 հաշվով պարտության էր մատնել թուրք Ջենք Իլդեմին: Արթուր Ալեքսանյանն Իլդեմին հաղթել էր նաեւ Լոնդոնի Օլիմպիական խաղերում:

Արթուր Ալեքսանյան. Հաղթանակս նվիրում եմ Հայաստանին, բոլոր հայերին

Հաղթանակս նվիրում եմ Հայաստանին, բոլոր հայերին, ասաց 96 կգ քաշային Արթուր Ալեքսանյանը երկրորդ տարին անընդմեջ նվաճելով հունահռոմեական ըմբշամարտի Եվրոպայի չեմպիոնի տիտղոսը: Թբիլիսիում անցկացվող առաջնության եզրափակիչում Լոնդոնի Օլիմպիական խաղերի բրոնզե մեդալակիրը 6:0 հաշվով պարտության մատնեց բուլղարացի Վլադիսլավ Մետոդիեւին, որին մրցագորգ էր դուրս բերել Բուլղարիայի հավաքականի գլխավոր մարզիչ, կրկնակի օլիմպիական չեմպիոն Արմեն Նազարյանը: Արթուր Ալեքսանյանի մարտավկաներն էին Հայաստանի հավաքականի գլխավոր մարզիչ Լեւոն Ջուլֆալակյանը եւ մարզիչ Սամվել Գեւորգյանը:

«Հպարտություն են զգում, որովհետեւ արդեն երկրորդ անգամ նվաճեցի Եվրոպայի չեմպիոնի տիտղոսը: Առաջին անգամ չեմպիոնի կոչումը նվաճելը դժվար է, երկրորդ անգամ՝ ավելի դժվար: Հաղթանակս նվիրում եմ Հայաստանին, բոլոր հայերին: Շնորհակալության աջակցության համար:

Այնպիսի գոտեմարտեր էի վարում, որ կանխում է մրցակիցների ակտիվությունը: Երեք բարդ գոտեմարտ եղավ: Ամենադժվարը վրացի մրցակցի հետ էր: Մրցավարներն էլ փորձում էին կողմնակալություն անել, բայց չհաջողվեց:

Այժմ կփորձեմ հանգստանալ եւ անցնել մարզումներին, հավաքներին՝ այս տարի աշխարհի առաջնությունում հաղթելու համար, իսկ երազանքս օլիմպիական չեմպիոնի տիտղոսն է»,- ասաց Արթուր Ալեքսանյանը հաղթանակից հետո Առաջին ալիքի ուղիղ եթերում:

Ֆոտո՝ NEWS.am Sport