Երեւանում, այսօր` հոկտեմբերի 14-ին, մեկնարկել է «Արեւորդի» միջազգային բնապահպանական երրորդ փառատոնը (ֆոտոռեպորտաժ):

Փառատոնի շրջանակներում Ազատության հրապարակից սկսեց դիմակահանդես-շքերթը, որի մասնակիցները` 500-ից  ավելի պատանիներ ու երիտասարդներ, կրում էին տարբեր թափոններից պատրաստված զգեստներ: Երթը, որը գլխավորում էր գերմանական «Կոնֆուսաո» կառնավալային նվագախումը, ընթացավ Ազատության հրապարակ, Հյուսիսային պողոտա, Հանրապետության հրապարակ, Նալբանդյան փողոց, Շառլ Ազնավուրի հրապարակ:

Այդ փողոցներում կարելի էր տեսնել տարբեր կենդանիների` պաստառներով, բնությունը պահպանելու կոչերով: Իսկ պաստառների վրա կային տարբեր գրառումներ` «Այսօր աղտոտված բնությունը վաղը վրեժ է լուծելու մեր երեխաներից», «Մի կտրիր ճյուղը, որի վրա նստած ես, վերջ տուր ինքնաոչնչացմանը», «Կանաչներ բոլոր երկրներից, միացեք», «Պաշտպանել բնությունը նշանակում է պաշտպանել հայրենիքը», «Բնության պահպանությունը` տնտեսության զարգացման գրավական» եւ այլն:

Երթուղու ընթացքում երեխաներին միացան մի շարք անցորդներ եւ մասնակցեցին Շառլ Ազնավուրի հրապարակում տոնախմբությանը, երգ ու  երաժշտությանը: «Արեւորդի» միջազգային բնապահպանական փառատոնի նախագահ Ռուբեն Խաչատրյանը մեզ հետ զրույցում նշեց, որ ամեն մեկը փորձել է իր շրջակա միջավայրում ամենավտանգված կենդանուն պատկերել եւ թափոններից պատրաստել են տարբեր զգեստներ, ըստ որում`  երեխաները իրենք են ընտրել կենդանիների հայկական տեսակները:

«Գեղեցիկ ավանդույթ է դարձել կենդանիների շքերթը, ամեն տարի ավելի շատ երեխաներ են մասնակցում թե մարզերից, թե Երեւանից, դա յուրովի կոչ է բոլորիս` ավելի ուշադիր լինելու մեր երկրի, մեր քաղաքի, շրջակա միջավայրի նկատմամբ, կարծում եմ` փորձը ստացված կարելի է համարել եւ արդեն կայացած: Եվ ով է ասել, որ էկոլոգիական խնդիրների մասին կարելի է միայն ցույցեր անել, կարելի է տոնախմբությամբ մարդկանց համոզել, որ ժողովուրդ, սա մերն է, մեր հայրենիքը, մեր արժեքները եւ եկեք այլ կերպ նայենք այս ամեն ինչին»,- ասաց Ռուբեն Խաչատրյանը` հավելելով, որ բացմանը ներկայացվելու Է «Green» ֆիլմը: