13:30 Ի՞նչ են մտածում երեւանցիները ՀԱԿ-ի հանրահավաքների մասին. հարցում Երեւանի փողոցներում | |
Հոկտեմբեր 05, 2011 | 05:19 Արդեն 5-րդ օրն է, ինչ Հայ ազգային կոնգրեսը Ազատության հրապարակում շուրջօրյա հանրահավաքներ է անցկացնում, որոնց վերաբերյալ հասարակության մեջ տեսակետները տարբեր են: Մեր համաքաղաքացիների մի մասը չի հավատում, որ ՀԱԿ-ը ինչ-որ արդյունքի կհասնի շուրջօրյա հանրահավաքներով, մի մասն էլ հույս ունի, որ երկարատեւ այդ պայքարն արդյունք կտա: NEWS.am-ի թղթակիցը Երեւանի փողոցներում փորձել է պարզել, թե ինչպե՞ս են նրանք վերաբերում Հայ ազգային կոնգրեսի շուրջօրյա հանրահավաքներին, ի՞նչ ակնկալիքներ ունեն, ինչ են կարծում` ինչպիսի՞ արդյունքներ կտան հանրահավաքները, կփոխվի՞ ինչ-որ մի բան, թե` ոչ: Այսպես` հարցված քաղաքացիների մեծ մասը չի հավատում, որ Հայաստանում շուրջօրյա հանրահավաքներով ինչ-որ բան կփոխվի: «Ձեւական երեւույթներ են, մարդիկ պարապ են մնացել, սկսել են իրենց համար գործ գտնել»,- ասաց քաղաքացիներից մեկը: Քաղաքացիների մի խումբ էլ համոզված է, որ եթե ժողովուրդը համախմբի, կարելի է հասնել հաջողության: Համախմբվելու կողմնակից քաղաքացիները, սակայն, չեն մասնակցում հանրահավաքներին, քանի որ նրանք էլ հույս չունեն, որ բան կփոխվի: Օրինակ`մեր զրուցակիցներից Սեդան հիասթափված է իր հայրենիքից, նա կցանկանար մասնակցել հանրահավաքներին, բայց հույս չունի, որ ինչ-որ բան կփոխվի: Հարցին, թե ինչո՞ւ չի մասնակցում բողոքի ակցիաներին, նա խոստովանեց, որ վախենում է իր կյանքի համար, քանի որ աչքի առաջ ունի մարտի 1-ի դեպքերը: Գայանեն եւս կարծում է, որ պետք է ինչ-որ բան փոխել, քանի որ ժողովրդի վիճակը շատ վատ է. «Ես գնահատում եմ իրենց արած գործը, բայց չեմ կարող ասել` արդյունք կունենան, թե` ոչ: Մարտի 1-ը ցույց տվեց, որ հանրահավաքների միջոցով չենք կարող հասնել փոփոխության, եւ հետո` մենք միահամուռ ազգ չենք»,- ասաց նա: Իսկ ահա, թոշակառուների մոտ Լեւոն Տեր-Պետրոսյանը վատ հուշեր է «արթնացնում», նրանք չեն ցանկանում, որ վերադառնան «այդ մութ ու ցուրտ տարիները», բայց մեծամասամբ` թոշակառուներին ոչ մի բան չի հետաքրքրում` թոշակից բացի: «Ես իրան չեմ ուզում, ես ազատություն եմ ուզում, էն ժամանակ ինչ էր` միլիցաներին սրել էին, տների վրա էին հարձակվում, տղաների ջեբերը դնում էր դանակը, պլանը, բռնում էին, իսկ հիմա ազատ ենք, միլիցաները մեզնից են վախենում»,- ասաց Վարդուհի տատիկը: Նա եւ իր սուրճ խմող ընկերուհիները մտահոգության առարկան մեկն էր` երբ կբարձրանան թոշակները: «Որ մի 60 հազար դառնա, սաղ աշխարհը կապրի»,- ասացին նրանք: Մանուկ պապիկն էլ Աստծուց լավ ղեկավար է խնդրում, որ մարդկանց կյանքը բարելավվի: «Մեր պես մարդիկ միշտ էլ էս ձեւի ապրել են եւ ապրելու են, ամեն մեկը իր եւ իր մոտիկների համար է դառնում ղեկավար: Ես չեմ հավատում ոչ մի բանի, նորից պիտի նստեմ ստեղ սոված, ոչ կնիկս ա աշխատում, ոչ ես, 20 հազար դրամ թոշակ եմ ստանում»: Մի խումբ քաղաքացիներ էլ հրաժարվում էին տեսախցիկի առաջ հայտնել իրենց կարծիքը, սակայն off the record ուշագրավ հայտարարություններ էին անում. «Լեւոնին, որ բռնեմ, թիքա-թիքա կանեմ, երկիրը ինքը սենց կործանեց»,- նշեց նրանցից մեկը: Շատերին ընդհանրապես չէր էլ հետաքրքում քաղաքականությունը, Հայ ազգային կոնգրեսը եւ նրանց շուրջօրյա հանրահավաքները: Որոշ մարդիկ կարծիք էին հայտնում, որ հանրահավաքը դրական ազդեցություն կունենա, որովհետեւ իշխանությանը կպահի լարվածության մեջ, եւ կստիպի, որ իշխանությունը իսկապես աշխատի ժողովրդի կյանքում դրական տեղաշարժեր կատարելու ուղղությամբ: Ավելի վաղ NEWS.am-ը հայտնել էր, որ սեպտեմբերի 30-ի երեկոյան, ՀԱԿ-ի հերթական հանրահավաքի ժամանակ հայտարարվել է 7-օրյա բողոքի անընդմեջ ակցիա սկսելու մասին: Հայ ազգային կոնգրեսը՝ Հայաստանի առաջին նախագահ Լեւոն Տեր-Պետրոսյանի գլխավորությամբ արտահերթ նախագահական եւ խորհրդարանական ընտրություններ է պահանջում: Պատրաստեց Ինգա Մարտինյանը | |
|
Всего комментариев: 0 | |