Հայաստանի հավաքականի գլխավոր մարզիչ Վարդան Մինասյանը հայտարարել է, որ մեծ ողբերգություն չի լինի, եթե իր թիմը պարտվի եւ դուրս չգա Եվրո-2012-ի փլեյ-օֆի անցումային հանդիպումների փուլ, հաղորդում է իռլանդական Irishtimes.com կայքը: Հայաստանի հավաքականը Դուբլին է ժամանել իռլանդացիների հետ վճռական հանդիպումից մեկ օր առաջ: Հայերը հասկանում են, որը պարտության դեպքում կզրկվեն անցումային հանդիպումների իրավունքից:

Թեեւ անցած տարվա սեպտեմբերին Երեւանում Հայաստանի հավաքականը 0:1 հաշվով պարտվեց Ջովանի Տրապատոնիի թիմին, սակայն խմբում երրորդ տեղ գրավելը` Ռուսաստանից եւ Իռլանդիայից հետո վատ արդյունք չէ նորաթուխ թիմի համար:

«Երբ ես գլխավորեցի թիմը` հավաքեցի նոր սերնդի խաղացողների: Նրանցից տասը 21 տարեկանից էլ երիտասարդ էին: Իմ գլխավոր նպատակը հզոր ոգով թիմ ստեղծելն էր: Թիմ, որը լավ ու որակյալ աշխատանք է կատարում: Ինչ վերաբերում է Իռլանդիայի հետ խաղին, ապա ողբերգություն չի լինի, եթե մենք պարտվենք: Մենք արդեն զգալի ձեռքբերումներ ունենք այս ընտրական մրցաշարում»,- հայտարարել է Վարդան Մինասյանը:

Հայաստանի հավաքականի հաղթանակները վերջին երեք խաղերում` Անդորայի, Սլովակիայի, Մակեդոնիայի նկատմամբ եւ երեք խաղում 11 գնդակ խփելը իռլանդացիներին ստիպում է զգուշանալ մրցակցից: Տրապատոնիի թիմին ընդամենը մեկ միավոր է անհրաժեշտ փլեյ-օֆի անցումային հանդիպումներին մասնակցելու համար:

Իռլանդիայի հետ անցած տարվա հանդիպումից հետո հայկական թիմը զգալիորեն աճել է, ինչի մասին խոսել են Տրապատոնին ու Իռլանդիայի հավաքականի ֆուտբոլիստները:

Մինասյանը երկու զգալի փոփոխություն է նշում:

«Մեր թիմը ձեռք է բերել վստահություն եւ փորձ: Իռլանդիայի հետ առաջին խաղի ժամանակ մեր թիմը երիտասարդ էր, բայց այժմ մեր ֆուտբոլիստներն ավելի փորձառու են եւ վստահ սեփական ուժերին: Մենք հասկանում ենք, որ Իռլանդիայի հավաքականը շատ ուժեղ թիմ է, բայց նաեւ հավատում ենք, որ կարող ենք հաղթել: Ինձ դուր է գալիս իռլանդական թիմի ոգին, որովհետեւ դա է կարեւորը: Նրանք պայքարում են բոլոր 90 րոպեներին, նույնիսկ, երբ Ռուսաստանի հավաքականին պարտվում էին 0:3 հաշվով: Միշտ ավելի վտանգավոր է խաղալ լավ կազմակերպված թիմի, քան այն թիմի հետ, որն ունի լավ խաղացողներ, բայց չունի թիմային ոգի», - ասել է Մինասյանը:

Վարդան Մինասյանը չի թաքրել է իր ուրախությունը Իռլանդիայի հավաքականի ավագ Ռոբի Քինի բացակայության կապակցությամբ: Քինն Իռլանդիայի հավաքականի լավագույն ռմբարկուն է` 51 գոլ:

«Քինը մեծ ֆուտբոլիստ է, հզոր ոգով խաղացող: Նրա բացակայությունը մինուս է իռլանդացիների եւ պլյուս` մեզ համար»:

Իռլանդիայի համար մեծագույն ձախողում կլինի, եթե սեփական խաղադաշտում չկարողանա վաստակել անհրաժեշտ մեկ միավորը:

«Երկու թիմերն էլ խաղալու են մեծ ճնշման տակ: Հաղթանակի ավելի մեծ շանսեր կունենա այն թիմը, որը կկարողանա ավելի լավ պայքարել դրա դեմ», – ասել է Մինասյաը:

37-ամյա Վարդան Մինասյանը նորեկ է 72-ամյա Տրապատոնիի համեմատ: Հաղթանակն այդ վետերանի նկատմամբ մեծ ձեռքբերում կլինի Հայաստանի հավաքականի նորաթուխ մարզչի համար:

«Խնդիրն իմ անձնական ամբիցիաները չեն: Դա վերաբերում է Հայաստանին եւ Իռլանդիային: Հաջողությունը կարեւոր է ամբողջ երկրի համար: Նույնը ճիշտ է նաեւ Տրապատոնիի համար: Խնդիրն անձնական նպատակները չեն: Դա վերաբերում է ամբողջ Իռլանդիային»,- հայտարարել է Մինասյանը: