Մեր քաղաքական գործիչները հավատացած են, որ Հայաստան-Մակեդոնիա խաղում Հայաստանի ֆուտբոլի հավաքականը կհաղթի` նվազագույնը 2 գոլի տարբերությամբ: Այս են ցույց տալիս NEWS.am-ի անցկացրած հարցումները նրանց շրջանում: Նրանք բոլորն էլ անհամբեր սպասում են խաղին, պատրաստվում են այն դիտել եւ բուռն կերպով սատարել մեր հավաքականին:

ՀՀԿ պատգամավոր Ռաֆիկ Պետրոսյանը Հայաստան-Մակեդոնիա խաղը դիտելու է տանը` ընտանիքի անդամների հետ միասին, նրանք բոլորը ֆուտբոլասեր են` կինը, հարսները, թոռները: Նա խաղադրույքներ չի դրել, բայց համոզված է, որ «մերոնք պիտի կրեն»:

Ռաֆիկ Պետրոսյանը նշեց, որ ֆուտբոլային խաղի դիտումը համադրելու է օղու հետ, ընդ որում` ամեն գոլին մեկ բաժակ օղի: Հարցին, թե եթե մերոնք 10 գոլ խփեն, 10 բաժակ օղի՞ է խմելու, նա արձագանքեց, որ այդքան չեն խփի, 3-4 հատ են խփելու, այսինքն` Ռաֆիկ Պետրոսյանը խմելու է 3-4 բաժակ օղի:

Ֆուտբոլային խաղը դիտելիս Ռաֆիկ Պետրոսյանը եւս շատ բուռն է երկրպագում. «Գոլ խփելու ժամանակ թոռս էնպես ա թռնում վերեւ, մի կիլոմետր թռնում ա»,- ասաց նա:

Իսկ ահա «Ժառանգություն» խմբակցության պատգամավոր Արմեն Մարտիրոսյանն ընտանիքում միակ ֆուտբոլասերն է: Նա խաղը դիտելու է մենակ` գարեջրի ընկերակցությամբ: Պատգամավորի կանխատեսմամբ`  մեր ֆուտբոլիստները նվազագույնը 2 գոլի առավելություն կունենան, երազներ չի տեսել, որպեսզի ասի, թե ովքեր գոլեր կխփեն: «Ներկա ոչ լավ իրավիճակը հնարավորություն չի տալիս երազներ տեսնելու»,- նշեց նա` հավելելով, որ տանը դիտելով, իր էներգետիկան հաստատ կհասցնի խաղացողներին:

«Հանրապետություն» կուսակցության առաջնորդ Արամ Սարգսյանը Հայաստան-Մակեդոնիա ֆուտբոլային խաղը դիտելու է Ազատության հրապարակում` ՀԱԿ-ի կազմակերպած ուղիղ հեռարձակմամբ: «Երկրպագելու եմ այնպես, ինչպես բոլոր երկրպագուները, կանխատեսումներ անելը անշնորհակալ գործ է, բայց իմ կարծիքով` մերոնք հաղթելու են ամենաքիչը 2-1 հաշվով»,- ասաց նա:

Ի դեպ, ավելի վաղ` Հայաստան-Սլովակիա խաղից հետո, երբ մեր հավաքականը 4:0 հաշվով փայլուն հաղթանակ տարավ, NEWS.am-ն անդրադարձել էր այդ թեմային եւ այդ ժամանակ եւս մեր քաղաքական գործիչները կանխատեսումներ էին արել Հայաստան-Մակեդոնիա խաղի վերաբերյալ:

Քաղաքական գործիչները կանխատեսումները տարբեր էին, բայց բոլորի մաղթանքը մեկն էր` հաջողություն մեր հավաքականին:

Նշենք, որ Եվրոպայի առաջնության ընտրական փուլի «B» խմբում հանդես եկող Հայսատանի հավաքականը այսօր հյուրընկալելու է Մակեդոնիայի հավաքականին: Հայաստան–Մակեդոնիա խաղը կարևոր նշանակություն ունի, Մակեդոնիայի հետ հանդիպումը կլինի նախավերջինը։ Վերջին խաղը մերոնք կանցկացնեն խմբում ամենագլխավոր մրցակցի՝ Իռլանդիայի հետ՝ մրցակցի հարկի տակ:

Պատրաստեց Սմբատ Սահակըանը