Ֆինանսական «արդար խաղը» հենվում է մի պարզ, բայց բավական ազնիվ փիլիսոփայության վրա` այն հասկացողության, որ ակումբները չպետք է իրենց ունեցած կանխիկ միջոցներից ավելին ծախսեն: Այս մասին հայտարարել է ՈՒԵՖԱ-ի նախագահ Միշել Պլատինին մի շարք եվրոպական երկրների սպորտի նախարարների հետ ունեցած ոչ պաշտոնական հանդիպման ընթացքում` Կրակովում կայանալիք Եվրո-2012 եզրափակիչ խաղերի վիճակահանությունից առաջ:

«Համոզված եմ, որ մեր մայրցամաքին վրա հասած տնտեսական ճգնաժամի պայմաններում այս փիլիսոփայությունը նոր թափ է ստանում: Ինչ-որ մեկը կարող է հարցնել` ինչու պետք է ուշադրություն դարձվի ակումբների ծախսերին: Պատասխանը պարզ է: Իրադրությունն այսօր ցավալի է. անցյալ տարի պրոֆեսիոնալ ակումբների ընդհանուր կորուստը կազմել է ավելի քան 1,2 մլրդ», - հայտարարել է Պլատինին, ում խոսքերը մեջբերել է ՈՒԵՖԱ-ի կայքը:  

«Արդարության սկզբունքները բացահայտ արհամարհանք եւ անգամ ծիծաղ են հարուցում: Երբ ակումբները խրվում են պարտքերի մեջ ֆուտբոլային աստղեր ձեռք բերելու համար, երբ կրեդիտով տիտղոսներ են շահում, երբ ֆուտբոլիստները դադարում են աշխատավարձ ստանալ, ինձ թվում է, անարխիայի եւ անկարգության իրավիճակում ենք հայտնվել, որտեղ արդեն առաջ գնալու տեղ չկա: Կոչ եմ անում ձեզ պաշտոնապես աջակցել, որ ֆինանսական «արդար խաղը» ֆուտբոլի բարոյական նորմերի այսօրվա և վաղվա օրվա մաս դառնա»,- եզրափակել է ՈՒԵՖԱ-ի նախագահը: